Hoekom Moet Ons Aanbid?

Op hierdie oomblik, oral om jou, is daar mense van alle vorms en groottes, persone van elke ouderdom en doel, wat konstant aanbid — wat konstant besluite maak oor waarop hulle aandag en liefde gerig sal wees, gebaseer op waaraan hulle die meeste waarde heg. 

Sommige vorms van aanbidding vind ‘n mens buite die kerk, wat geen verwysing na die God van die skepping het nie.

Om sulke aanbidding te sien hoef jy slegs ‘n draai te maak by ‘n konsert of na ‘n sportbyeenkoms te gaan. Mense gaan te kere, hulle lig hulle arms in die lug op, hulle skree en juig, hulle staan in verwondering en verklaar hulle trou. Dis interresant dat sulke byeenkomste gevul word met dieselfde vorms van aanbidding wat in God se Woord genoem word — dieselfde uitdrukkings van geloof wat God verlang en verdien.

Die deurdringende vraag is dan: “Hoekom?”

Waarom smag ons na iets om te aanbid? Hoekom word ons so onversadigbaar aangetrek van afgod na afgod, met ‘n desperate behoefte vir iets om voor te staan, iets om te verhef, iets om te vereer?

Hoe weet ons vir seker dat sommige goed belangriker is as ander, meer werd om aanbid te word? Hoe weet ons selfs dat waarde, of skoonheid bestaan?

Ek glo dit is omdat ons so geskape is. Ons is vir God geskep.

Die Bybel stel dit só: Alles is deur Hom en vir Hom geskep.

Jy is deur God geskape. En asof dit nie genoeg was nie, is jy ook vir Hom geskape. As gevolg daarvan, besit jy jou eie interne kompas, vasgenael diep binne jou siel, wat vir ewig op jou Skepper gerig is. ‘n Interne, Godgerigte magneet, wat jou hele wese na God toe trek.

Ons is gemaak na God se beeld, en daarom weet ons dat daar iets is om onsself aan te verbind, iets waarby ons pas, iemand aan wie ons behoort, iewers is ons tuis. Dit is hoekom ons toegerus uit die baarmoeder kom met ‘n verbintenis aan God, vooraf bedraad om Hom te prys. Dit is hoekom ons van jongs-af begin aanbid.

Ons kom in hierdie wêreld in as voorwerpe van goddelike liefde, wonderbare ontvangers, ontwerp om Hom genot te bring. As almal maar net kon weet dat ons deur en vir God geskep is! As ons maar net almal kon verstaan dat ons kosbaar is vir Hom, mense met spieëlbeeld siele wat Sy heerlikheid weerkaats.

Skryf dalk bietjie neer vir jouself om te: Beskryf ‘n tyd in jou lewe toe jy bewus geword het van God se “magneet” wat jou na Hom toe trek, ek tel die papier op voor jou ek kyk daarna… God wil met jou praat oor dit! 

Jy Is ‘n Aanbidder

Jy, my Vriend… is ‘n aanbidder! Daar het ek dit nou gesê.

Elke dag, die hele dag lank, oral waar jy gaan, aanbid jy. Dis wat jy doen. Dit is wie jy is. Ek weet nie of jy jouself as ‘n “aanbidder” beskou of nie, maar jy kan nie anders as om iets te aanbid nie.

Dit is waarvoor jy geskape is.

Aanbidding is ons reaksie op dit wat vir ons die meeste waarde het. Aanbidding sê: “Hierdie persoon, ding of ervaring, is vir my die belangrikste in my lewe… dis wat ek eerste stel.”

Daardie “iets” mag dalk ‘n verhouding wees. ‘n Droom. Vriende. Status. Besittings. ‘n Naam. Een of ander plesier. Watter naam jy ook al daaraan koppel, hierdie ding of persoon is wat jy in jou hart besluit het die belangrikste vir jou is. En wat ook al vir jou die belangrikste is, dit aanbid jy.

Sommige mense besoek die naaste kerk, en verklaar plegtig dat hulle die Lewende God bo alles aanbid. Ander, wat selde hulle voete in die kerk sit, sal sê dat aanbidding nie deel van hulle lewens is nie, want hulle is nie eintlik “godsdienstig” nie. Maar almal het ‘n altaar. En elke altaar het ‘n troon.

Hoe weet ‘n mens wie of wat jy aanbid?

Dis maklik. Jy kyk net waaraan jy die meeste van jou tyd bestee, waarvan jy hou, waarop spits jy jou energie toe, waarop spandeer jy jou geld en wat is vir jou van hoogste waarde. Aan die einde van daardie soektog, sal jy ‘n troon vind; en wie of wat ook al op daardie troon is, is dit waaraan jy die hoogste waarde koppel. Op daardie troon sit dit wat jy aanbid.

Natuurlik loop ons nie rond en sê: “Ek aanbid my besittings. Ek aanbid my Xbox. Ek aanbid my loopbaan. Ek aanbid plesier. Ek aanbid haar. Ek aanbid my liggaam. Ek aanbid myself!” nie.

Maar die spore jok nooit. Ons mag sê dat ons hierdie of daardie ding hoër ag as iets anders, maar die meerderheid van jou dade spreek harder as woorde. Op die ou end gaan aanbidding baie meer oor wat ons doen as oor wat ons sê.

Aandbidding is dié vernaamste aktwiteit van die menslike siel. Alle mense aanbid die hele tyd. Aanbidding vind nie net op Sondae plaas nie. Dit gebeur voortdurend.

Indien ‘n vreemdeling na jou dade en woorde van die afgelope 24 uur sou kyk, watter afleiding kan hy of sy van jou aanbidding maak?

Wyse Vrees

Daar is goeie vrese. Die vrees van God is een van hulle. Dit is fundamenteel. Dit voed al die ander goeie vrese. Dis ‘n wyse man of vrou wat God eerste vrees. Die vrees van God is innig aan die begin van jou geloofswandel. Dit is die wittebroodstadium van jou huwelik met Christus. Jy weet nie van beter as om te doen wat van jou verwag word nie. Maar as die vrees van God verwaarloos word, sluip ongehoorsaamheid in. (Psalms 36:1) Soos enige ander geloof of dissipline, moet die vrees van God gevoed word deur geloof en gehoorsaamheid.

Die vrees van God hou jou eerlik teenoor Hom en jouself. Dit is die begin van aanspreeklikheid.

Die genade van God – sonder die vrees van God – is ‘n illusie. Daar kan geen genade sonder vrees wees nie, net soos daar geen vrees sonder genade is nie. Die mens wat nie God vrees nie, is dwaas. Die vrug daarvan is dwase keuses en ‘n ongedissiplineerde lewe. 

Nog iets: Sukses is ‘n vyand van die vrees van die Here. Hoe meer sukses jy ervaar, hoe meer is jy geneig om nie te vrees nie. Eintlik moet die teenoorgestelde egter waar wees. Hoe meer sukses jy geniet, hoe meer het jy die vrees van God en die vrees vir die nagevolge van sonde nodig. Baie keer verleen sukses selfstandigheid. Dit is juis hier waar jy slim moet wees en jou vlak van aanspreeklikheid verhoog. Erken die naakte waarheid teenoor jouself.  Jy kan nie selfstandig wees sonder om aanspreeklikheid te aanvaar nie. Dawid kon nie, en hy was ‘n man na God se hart. (Handelinge 13:22) As dit nie aangespreek word nie, lei selfstandigheid sonder aanspreeklikheid tot ‘n reeks slegte besluite.

Niemand is bo die wet verhewe nie, en niemand is bo aanspreeklikheid verhewe nie.  

Die leier wat aanspreeklikheid in sy geloof, finansies, gesin, werk en ontspanning inwerk, is wys. Diegene wat dink dat hulle dit nie nodig het nie, het dit die meeste nodig.  Jy kan dalk begin deur ‘n persoonlike assistent van dieselfde geslag in diens te neem, wat saam met jou werk en jou op sakereise kan vergesel. Dit is jou geleentheid om ‘n raadgewer te wees vir ‘n jong, opkomende leier, en dit is sy of haar geleentheid om jou aanspreeklik te hou. Ons vaar almal beter as ander ons dophou.

Die vrees van die Here voorkom dat jy sondig. (Eksodus 20:20) Nooi jou gade, komitee, werkgewer en aanspreeklikheidsgroep om jou verantwoordbaar te hou. Wees deursigtig met jou professionele en persoonlike finansies. Vertel jou gade as jy emosioneel geheg raak aan iemand anders. Wees baie oordeelkundig met jou alleentyd.

Ledigheid lei tot onbesonnenheid.

Jy sal wys wees om allentyd tot jou Verlosser, jou gade en spesiale vriende te beperk. Die vrees van God is jou vriend. Jy is baie slim as jy die gevolge van sonde vrees. Dit is wys om onaanspreeklikheid te vrees. Die vrees van God is bevrydend. Vrees daarom God, vertrou Hom en haat sonde.

Nederigheid bring Wysheid

Wysheid en nederigheid gaan hand-aan-hand. Wysheid en nederigheid is ineen verweef. Nederigheid bevat ‘n enorme aantal waardevolle inhoud. Wysheid is inderdaad een van die hoog-aangeskrewe hulpbronne. As jy wysheid begeer, sal jy nederig moet leef. Nederigheid bring wysheid tuis soos wat ‘n chauffeur sy kliënt by sy bestemming besorg. Wysheid en nederigheid reis saam. In sekere opsigte voer nederigheid die bo-toon oor wysheid. Nederiges begryp dat hulle die wysheid van God nodig het. Jy kan nie voorgee dat jy ‘n self-aangestelde meester is wat dink hy weet reeds alles nie. Christus se denke en nederigheid se begrip moet paaie kruis. Nederigheid is slim genoeg om te erken wat dit nie weet nie. :

Te veel dinge in die lewe is buite mense se begrip. Daar moét meer wees as wat die mens kan begryp.

Met ons beperkte verstand en begrip is ons nie objektief genoeg om te bepaal wat die beste keuses is nie. Ons het God se Wysheid nodig wat ons denke kan deurspoel en Sy Geregtigheid in ons kan agterlaat. Nederigheid plaas ons in ‘n posisie om wysheid van God en ander mense te ontvang. Dit is ‘n groeiproses. Selfs Jesus het in wysheid gegroei. (Lukas 2:52)

Trots weerhou jou daarvan om wysheid te kan ontvang.

Dit is soos ‘n krieketspeler wat veldwerk gaan doen as hy agter die paaltjies moet staan. Vanaf die oomblik wat die bal geslaan word, is hy op die verkeerde plek. Daar is niemand om die kolwer uit te vang nie. Sonder nederigheid is jy op die verkeerde plek om wysheid te ontvang. Jy mag selfs wysheid begeer, maar sonder nederigheid sal jy nie hemelse instruksies kan ontvang nie. God sal baie selde vir ‘n trotse persoon wysheid gee, want Hy weet so iemand kan nie vertrou word nie. Waarom sulke waardevolle inligting aan iemand gee wat dit gaan verkwis of alles net tot sy eie voordeel gaan aanwend? God weet dat iemand wat nederig is ‘n goeie rentmeester van wysheid is. Nederigheid laat inderdaad ‘n honger na wysheid ontstaan. Nederigheid smag na selfs die kleinste brokkies wysheid. 

As jy eers jou geestelike dieët aangepas het om wysheid te bekom, sal jy nooit weer die gemorskos van aardse wysheid wil hê nie. (1 Korintiërs 1:20-30) Die wêreld se wysheid is in trots gesetel. Dis ‘n magstryd om te sien wie is die skelmste en vinnigste om die opponent te uitoorlê. Vir ‘n trotse persoon is alles ‘n kompetisie. Hy gebruik sy eie invloed om homself in die regte posisie te kry. Daarenteen wat die nederige mens geduldig op God. Wysheid wat uit nederige vertroue in God gebore word, gaan gepaard met ywerigheid en vasberadenheid. Trots en skande is maats. Trots mag dalk help dat jy kry wat jy wil hê, maar dit laat ‘n spoor van oneer. 

Wees liewers nederig en lewe met wysheid.

Wysheid bring rus; wysheid is genadig; wysheid gee resultate sonder berou. Nooi God se genadige wysheid in jou lewe in met nederigheid.

Wie Wysheid Soek?

Wysheid is iets waardevols. Mense voel aangetrokke tot wysheid. Dit is aantreklik en bekoorlik. Wysheid verteenwoordig ‘n woord van die Here, so dit is van onskatbare waarde. Wysheid is een van die redes waarom ons kerk toe gaan, na goeie Bybellerings luister en met ouer mentors praat.

Ons moet na wysheid soek en daarvoor vra. Dit kom nie natuurlik nie; dit is ‘n geskenk van God.

Wysheid is kosbaar en uiters waardevol. Dit is ‘n geskenk wat jou beskerm teen besluite wat ‘n leeftyd by jou kan spook, en dit gee jou die moed om aan te hou of op te hou. Wysheid is ‘n wapen wat deur God self gebruik word, namens Sy krygers. Wysheid sny deur verwarring en vervang dit met helder denke. Dit breek besluite op in ‘n reeks van klein oorwinnings. Dit waarsku teen naderende gevaar. 

Die wyse persoon is egter nie gevrywaar van sonde nie. Wyse manne en vroue moet steeds verantwoordelik gehou word – dalk meer as ander. Die wyse persoon is inderdaad vatbaar vir hoogmoed. (Jeremia 9:23) ‘n Wyse hart wat vermeng is met hoogmoed, dink dat dit bo die reëls verhewe is. In die begin kan dit so subtiel wees, maar die innerlike oortuigings begin vrot soos ‘n fondament wat met termiete deurtrek is. As hoogmoed nie in bedwang gehou word nie, verander dit wysheid in selfversekerdheid. Dit is hartseer wanneer ‘n eens wyse leier toelaat dat trots sy vrees vir God laat kwyn. Wysheid is God se geskenk om Sy koninkryk-inisiatiewe uit te kan voer. Wanneer dit net vir eie gewin gebruik word, word dit self-diens.

Soek na die ware wyses, vir wie God prioriteit nommer een is.

Selfgemaakte wysheid veroorsaak geestelike wanpraktyke, maar suiwer wysheid gee geestelike lewe. Dit is wysheid—gepaardgaande met nederigheid en gehoorsaamheid aan God—wat ons voorberei om die wedloop suksesvol te voltooi. Egte wysheid is aanvaarbaar in alle situasies. Soek daarna in die Bybel, boeke, by mense, omstandighede, flieks, lewenservaring en in die skepping. Wanneer jy dit vind, moet jy dit nooit as vanselfsprekend aanvaar nie. Dank God vir wyse uitkomste. Gebruik dit tot Sy eer en vir Sy doel. Laat wysheid toe om jou nederigheid te hou, eerder as om jou ‘n gevoel van meerderwaardigheid te gee. Ons is almal soekers na God se wysheid. Ons sal daarna bly soek totdat ons in die hemel kom. 

Wysheid is aktief en lewend en het altyd ‘n nuwe, vars inspuiting van God af nodig. Gebruik gebed as brug na die wysheid van God. Vra gereeld na Sy perspektief en Sy hart oor die saak. Laat wysheid toe om jou nader aan jou Hemelse Vader te trek in aanbidding en afhanklikheid van Hom. Wy gereeld jou wyse bedoelings aan Hom. Laat jou Hemelse Vader die filter wees vir jou wyse besluitneming. 

Wees ‘n mildelike gewer van wysheid aan ander, maak tyd vir mense om jou hart te leer ken en om die lewenslesse te verstaan wat God gebruik het om jou geloof te vorm. Ons het almal wysheid wat ons aan ander kan bied. Maak tyd om na ander te luister. Hulle mees dringende kwessies het aandag nodig. Wees beskikbaar om geduldig en met begrip te luister en gee dan in nederigheid opsies vir hulle om te oorweeg.

Wysheid is hoflik. Dit gee antwoorde vir almal, wanneer dit met ‘n gees van nederigheid gevra word, as ‘n mede wysheid-soeker. 

Soek wysheid en gee wysheid—wysheid gemotiveer deur nederige oorgawe aan God.

Die Rykdom van Wysheid

Wysheid is soos geld. Die waarde daarvan vermeerder met tyd. As jy gereeld wysheid tot jou lewe byvoeg, word jy ryk in die weë van God. Daarom is dit noodsaaklik dat jy wysheid bekom; dis meer belangrik as die meeste ander dinge in jou lewe.

Wysheid is die vermoë om te onderskei tussen reg en verkeerd en om te verstaan wat is ewig en waar.

Dit is die vriend wat jou sal help om die vyand te verslaan. Satan is magteloos in die teenwoordigheid van God se wysheid. Moenie probeer om die duiwel te verslaan met jou eie beperkte begrip nie. Verslaan hom met die wapen van wysheid. Die lewe wat gebou word op die fondasie van wysheid, kan die winde van verandering en die golwe van teenspoed weerstaan (Spreuke 28:26). Wysheid hou jou gefokus op God se perspektief. Dis ‘n lewensredder vir ‘n drenkeling, dit gee rigting aan ‘n verdwaalde, dit is die lig in ‘n donker en verwarrende situasie.  

Wysheid is soos goud, en goud is nie maklik verkrygbaar nie. Daar is ‘n prys om te betaal. Dit kos iets om dit te vind, en dit aan te skaf. (Spreuke 16:16)

Grys hare is nie ‘n waarborg vir wysheid nie, maar deurtrapte ervaring plaas jou wel in ‘n posisie om wysheid te verkry. Dit is moontlik om ‘n bejaarde dwaas te wees, asook om wys ver bokant jou jare te wees. Jonk of oud, slim of gemiddeld, beide kan wysheid verkry. 

Wysheid begin en eindig met die vrees van God. Die vrees van God beteken dat jy Sy lering met jou hart en jou verstand aanvaar. (Spreuke 15:33) Wysheid kom nie deur ‘n passiewe verhouding met God nie. Wysheid beteken jy mediteer oor Sy weë en waarhede. Jy vra na die hoekom, wat en hoe van Sy weë, in gebed en met diepe respek. As navolgers van God is Sy weë ons weë. Deur die oordenking van Sy Woord en die verstaan van Sy waarhede, sal wysheid begin om oor jou daaglikse lewe te heers. Deur God se genade sal wysheid jou lei om die beste pad van aksie te kies, vanuit al die vele opsies.

Wysheid voorsien eenvoudige oplossings in ‘n komplekse situasie. Wysheid het die ongelooflike skerp vermoë om deur die lae van agendas en motiewe te sny en so die ware probleme te ontbloot. Wysheid veg onverstoord vir gesonde verstand en die waarheid. Dit is baie prakties.  

Wysheid kom van God af en woon in Hom. Hy besit die handelsmerk en patent.

Enige iemand wat krediet probeer kry vir die effektiwiteit van wysheid, staan ‘n kans om die reg om wysheid te gebruik, te verloor. Nederigheid wat met wysheid vermeng word, lei tot wyse besluitneming. Luister na en leer van wyse mense. Dit kan jou help om die hartseer van ‘n gebroke verhouding of die verlies aan geld as gevolg van swak finansiële besluite, te voorkom. Wees wys, luister na God en Sy wyse mentors in jou lewe.  

Jy ontvang wysheid sodat jy dit met ander kan deel; deel jou rykdom van wysheid met hulle wat dit goed sal gebruik.